政情：Miriam搵到徒弟戰運輸界

富貴黨備戰二○一二年立法會選舉大變陣，主席Miriam劉健儀已盤據十五年嘅航運交通界功能界別議席，現正積極部署轉戰直選新界東，而中常委田北辰就鐵定出戰新界西。

據悉，Miriam近月已靜雞雞物色到一位接班人選，以穩守航運交通界功能界別議席，由於仲要觀察，所以一直未向外界披露。不過，佢收徒為轉戰直選鋪路嘅消息，近日已喺黨內傳開，呢位Miriam新愛徒相信係喺外面延攬入黨，依家每個禮拜一參與由田二少領軍嘅「一般事務關注組」會議，熟習富貴黨政策立場同文化，互相適應緊。

向Miriam求證轉戰新東之說，佢話富貴黨○八年一併輸掉新界東、西，下屆一定派人參選，而佢亦有意直選，但強調布陣人選要經內部再協調。佢又證實已物色到代佢參選航運交通界嘅適合人選。

若Miriam轉戰新東，首當其衝嘅係黨嘅西貢委任區議員「哪吒」方國珊，事關黨前主席田北俊引退後，哪吒一直被視為最有力代黨收復失地嘅人選，豈料依家橫生枝節，打亂部署。哪吒就話一二年選舉依家言之尚早，一切視乎佢明年直選區議會戰績同當時區民支持度而定。