政情：一行禪師開示撐場者眾

被譽為當今最具影響力嘅宗教人士之一嘅一行禪師，尋晚喺會展舉行公開講座，吸引近八千人入場，為佢長達兩個半月嘅亞洲之旅畫上完美句號。一眾城中名人都有撐場，親身嚟體會一行禪師嘅道理。

一眾城中名人都同至愛前往，包括香港大學專業進修學院院長李焯芬夫婦、廉政專員湯顯明同緋聞女友入境處助理處長陳詠梅、前潮屬社團總會主席莊學山夫婦，同公務員事務局前局長王永平等。

本身係佛教徒嘅李焯芬話，香港人工作壓力大，好需要尋求心靈淨土。佢多年前同大師結緣，至今已邀請大師訪港三次，今次講座都係港大百年校慶嘅前奏活動。一行禪師曾獲美國黑人民權領袖小馬丁路德金提名角逐諾貝爾和平獎，李焯芬亦讚揚大師係和平運動嘅長期推動者。

講到大師嘅至理名言，平叔話感受最深刻嘅一句說話係「拉人坐監都要有慈悲心」。湯顯明同緋聞女友陳詠梅亦有出席，湯顯明睇過大師嘅著作，好認同佢嘅哲理。李焯芬就對大師嘅暢銷著作《Anger》（憤怒）感受良深，佢話書中教人學習點樣控制情緒，好啱香港人睇。