政情：搞搞政：阿石幫陳裕光講好話

喺最低工資水平未正式出爐前，大家樂扣飯鐘錢惹起軒然大波，大家樂主席兼臨時最低工資委員會成員陳裕光更被炮轟走法律罅，最後喺群眾壓力下收回成命。當人人都話政府唔應該再委任陳裕光入最低工資委員會之際，喺同一委員會嘅職工盟創會主席劉千石尋日就幫佢講好話，指陳裕光知錯能改，就算入番委員會都唔係大問題喎！

收回成命知錯能改

阿石話臨資會一班成員合作咗咁耐，已經過咗最艱難嘅磨合期，正所謂「做生不如做熟」，如果可以，班底唔變當然最好。咁陳裕光係咪適合繼續做委員呢？阿石個人就好支持，話陳裕光最後都收番扣飯鐘錢嘅做法，反映佢自己都覺得唔妥當，算係知錯能改，就算再做委員都可以說服公眾。

其實，當初有兩個商界代表企硬要時薪二十四蚊，最後係陳裕光首先軟化，指二十八蚊都可以接受，對於勞工界嚟講，都算係一個「有得傾」嘅人選，所以阿石為佢講好話都無可厚非嘅。

咁阿石又會唔會入番委員會呢？佢透露政府有問佢意願，但佢就仲未回覆實，因為委員會工作實在太沉重，成日都要開十幾個鐘嘅馬拉松會，對健康構成好大負擔，但佢仲好希望可以為勞工做多啲事，所以到依家都仲未決定到喎！