政情：IT豪讚電動跑車夠靜

早幾日獲邀參加香港電動車巡遊嘅立法會資訊科技界議員「IT豪」譚偉豪，當日仲有底特律電動車控股嘅行政總裁林秀山親自陪伴，試揸呢間公司出品嘅蓮花跑車。開頭佢都擔心電動車唔夠力，點知揸落原來唔係咁，除咗個車頭好順之餘，另一個優點就係非常寧靜，靜到連佢都話唔覺自己揸緊跑車。

IT豪話，當日佢哋原本跟住大隊由天水圍濕地公園出發，點知一個唔覺意行錯路，只好沿住吐露港公路駛返科學園。佢話吐露港公路限速比較高，令佢可以真正試到部車嘅性能，佢試揸完之後大呼過癮，仲有啲心郁郁，打算明年三月部車喺香港推出時買番部。

電動車要搵地方充電，IT豪建議立法會新大樓嘅停車場整番幾部充電器，除咗可以鼓勵議員用電動車外，亦可起示範作用，真係一舉兩得。話時話，部車到底幾多錢？大概八萬蚊美金，即係唔使六十萬港元，香港仲有免稅優惠添！