政情：洪丕正想辦街上嘉年華

為期兩日嘅「渣打藝趣嘉年華2010」尋日閉幕，合共有六萬五千名市民入場參觀，比舊年多三成，除一班去玩嘅小朋友盡興外，渣打行政總裁洪丕正都好興奮，話見到藝趣嘉年華一年比一年多人支持，希望將來可以再搞大啲，除咗用維園嘅草地場之外，仲可以進軍硬地足球場，甚至可以衝出維園「上街」！咪咁敏感啦，佢只係話想去街上巡遊啫！

巡遊造型千奇百趣

洪丕正話今年係第十屆藝趣嘉年華，一開始搞時得幾百人參加，赤柱、山頂都有做過，後來愈嚟愈多人，先移師去維園舉行。每年藝趣嘉年華都會有一個大型巡遊，今次就由各中小學生以「金、土、水、火、空氣」為題設計巡遊服裝，造型千奇百趣，大人細路都玩得開心。眼見自己湊大嘅「BB」咁受歡迎，難怪佢想食埋足球場嚟做啦。

旅遊發展局主席田北俊都好投入，話今年帶埋三個孫仔嚟玩，三個孫入到場玩得好開心，捉都捉唔住。對比起聞名國際嘅巴西里約熱內盧大型嘉年華，田少覺得藝趣嘉年華唔會玩到通宵達旦，啱晒做合家歡節目，實會支持佢哋衝出草地咁話！