政情：林鄭踩德成局長搶功

政府計劃申辦二○二三年亞運會變咗一場鬧劇，民政事務局局長曾德成連番出招，先係推出劈價版申亞方案，跟住又話必要時會問深圳、廣州甚至澳門借用場地，但仍然不得民心。據講單車運動員李慧詩為香港攞咗廣州亞運第一金之後，有謀士諗定若然香港運動員喺廣州亞運有好成績，就會用嚟做政府硬銷申亞嘅新招，不過呢個如意算盤未必打得響。

促使政府起單車場

被外界冠以「好打得」嘅發展局局長林鄭月娥尋日忽然搶功，佢接受電台訪問被問到過去三年做發展局局長嘅感受，講講吓突然話仲有啲時間，竟然主動提起前日見到單車運動員亞運奪金令佢「非常非常興奮」，因為佢四年前多哈亞運時以民政事務局常任秘書長身份見證單車隊成績卓越，之後促使政府決定興建首個國際級室內單車場，畀到運動員一定鼓舞喎！

林鄭仲話，香港運動員嘅水平其實相當卓越，但需要支持先至可以將表現推到頂點，又話識得單車隊教練沈金康，大讚佢為賽事投入全部精力兼愛護運動員，而運動界每一名成員都值得支持同尊重，要支持，投資係不二之門。

唔係啩！主持人問緊做發展局局長嘅感受喎，林鄭竟然摷番四年前做嗰個位嘅嘢出嚟講，佢唔單止好打得，仲好搶得（功）添喎！

心水清嘅人聽到呢番說話，都知林鄭既暗示今日佳績只係前人種落嘅果，亦明「潤」有人冇遠見，起場館唔一早諗定要起國際級，對運動界支持又唔夠，搞到依家申亞先嚟臨急抱佛腳。咁擺明係寸德成局長推出劈價版申亞方案，幾個運動場館唔提升做國際級水平場館，根本唔掂檔啫！

十年前應痛定思痛

講真，如果政府一心諗住再次申亞，十年前申亞失敗就好應該痛定思痛，新嘅場館都要達到國際級水平，甚至舊年搞東亞運時一併提升舊場館，唔使等到今時今日先至話要大興土木，到巿民嫌嘥錢，就話可以唔使整咁靚、咁多，兼出口術話唔申亞可能新場館興建無期啦！咁兒戲，香港巿民點撐得落呢？