政情：棋哥賞《上河圖》睇人捉棋
政情：棋哥賞《上河圖》睇人捉棋
電子動態版《清明上河圖》香港展覽尋日預展逼爆，唔少城中名人亦有去捧場，部分喺上海世博已睇過㗎喇！
全國政協常委陳永棋帶埋大女同外孫Sean一齊嚟睇，話今次可以睇足兩個鐘，唔少細節位睇得更清楚，連一間房裏面有人喺度捉棋都睇到！棋哥又大讚中國人好叻，竟然諗到將《上河圖》變成動畫，認真一絕。已經係第三次睇嘅立法會議員林大輝就同老婆拍住拖睇，佢話睇完之後引起佢對《上河圖》嘅興趣，仲特別研究畫中嘅動物同植物。
單拖睇畫嘅全國人大常委范徐麗泰就話，世博前佢喺江蘇已經睇過類似嘅動態畫，不過一見到動態版《上河圖》，感受大大不同，尋日喺香港再睇感覺更勝一籌。至於睇咗幾分鐘就趕住去睇亞運中日足球大戰嘅港協暨奧委會會長霍震霆亦大讚，仲拎咗部iPhone 4出嚟影相留念。