政情：搞搞政：王惠貞更上層樓搞慈善吸新血

呢排九龍社團聯會嘅曝光率奇高，先有理事長Connie王惠貞獲增補為全國政協委員，之後聯會更加帶隊上京，獲得中央主管港澳事務嘅領導親自接見，仲足足傾咗成個鐘頭添！

Connie話聯會每次換屆後，都會安排去北京見吓官員交流意見，今次拜訪咗港澳辦、統戰部、民政部同衞生部，向唔同部門反映咗唔少香港市民關注嘅議題，好似長者返內地生活、食物安全、國民教育、內地旅行團零團費、港人內地醫療質素等。據聞負責嘅官員反應正面，表示會慎重考慮呢啲建議。不過，好多人都關心，聯會今次去北京有冇傾到敏感嘅政治議題，Connie斬釘截鐵咁話「冇」，因為呢個唔係今次訪京嘅目的。

嚟緊香港有幾個選舉，地區團體嘅一舉一動都惹人注目。聽講聯會已經同另外八個團體組成「九龍義工團」，義工數目超過五千人，服務層面仲相當廣泛，老人、青年、新移民乜都有。

明年就係區議會選舉，聯會動作多多，而呢次義工團，難免會令人覺得聯會係想吸新血，擴大網絡，日後借助班鴨仔團搖身變成選舉機器，聯會要小心唔好成為人哋嘅假想敵先至好喎！