政情：中投插旗名人熱論QE2

揸住內地二千億美元外匯儲備巨資嘅中投公司，尋日終於喺香港成立佢哋首個海外辦事處，本港政商名人空群而出見證歷史時刻，前財爺梁錦松、中策集團主席馬時亨、港鐵主席錢果豐、前招商局集團董事長秦曉、亞洲金融董事長陳有慶、滙豐控股董事鄭海泉等人齊齊現身，行會成員查史美倫、老公查懋成同埋囝囝亦前後腳到場，場面墟冚熱鬧。

咁重要嘅時刻，主人家中投公司董事長樓繼偉、副總經理汪建熙梗要親自南下招呼賓客啦，中投國際（香港）董事長劉遵義都忙到氹氹轉。不過，一講起美國再次開動印鈔機狂印六千億美元銀紙，即係俗稱「QE2」嘅第二輪量化寬鬆政策，眾人都笑唔出，肥亨仲告誡大家：「識上車至緊要識落車！」叫佢再贈多幾句，佢笑笑口惜字如金，唔肯再解釋多啲，大家惟有自己參透啦！

秦曉亦直言QE2好麻煩，啲熱錢打亂晒內地同香港壓抑樓價嘅部署。冇法啦！板斧得兩個，一係加息，一係實施資金管制，但係啲熱錢多到好似洪水猛獸咁，點擋得晒吖！

錢果豐都話QE2未見錢已先見炒風，樓股兩市資產價格推高晒，佢話未來八個月係好重要嘅觀察期，萬一再嚟個QE3就好麻煩！