政情：周永成教投資咪淨買金
政情：周永成教投資咪淨買金
周生生集團總經理周永成尋日獲演藝學院頒授榮譽院士銜，佢太太同甚少露面嘅囡囡周嘉穎都嚟撐場，原來囡囡係專業珠寶家，現任周生生生產運作高級主任。
近月嚟，周老闆可謂名利雙收，除獲頒榮譽院士銜外，旗下周生生集團股價都好似搭咗直升機咁，由八月底近十四蚊低位開始，一直升到尋日收市嘅二十二蚊兩角五仙，喺短短兩個幾月升咗五成九。佢話周生生股價跟大市至水漲船高，又話周生生並唔係升得最多嘅股份喎！
雖然股價係咁升，但周老闆對金市同股市睇得好審慎，坦言投資黃金冇利息，只靠金價升幅獲利，亦冇數據參考，好似佢事前都未諗過今年金價咁升法，所以寄語市民要分散投資，除咗買黃金，仲要喺其他方面投資。講到股市，佢就話好難估，總之大家投資要穩健，量力而為。
周永成獲演藝學院頒授榮譽院士銜，太太同囡囡周嘉穎到場分享喜悅。