政情：陳維安跟一行禪師學禪

國際知名佛學大師一行禪師早前來港主持「覺醒生活營」，帶領逾千名嚟自世界各地嘅參加者遠離煩囂，禪修五日。參加者需要朝五晚九咁進行靜坐、行禪同聽道等活動，唔少高官同社會知名人士都卸下日常重擔，換上輕便服裝，跟禪師回歸自然。

著名本土藝術家又一山人早喺○七年已被一行禪師嘅講道感動，今次更自動請纓為體驗營設計宣傳品。五日禪修營過後，又一山人最深刻係同近三百名參加者跟一行禪師行禪，再好似紅番部族咁圍住禪師坐喺草地飲茶。佢話嗰個情景對都市人嚟講確係匪夷所思，但人生本該如此，感謝禪師帶佢哋回歸原始喎。

有份參與體驗營嘅，仲有近排畀殺校同小班教學等教育政策纏身嘅教育局副局長陳維安。陳維安早幾年已喺河內參加過由一行禪師主持嘅生活營，非常欣賞佢主張嘅正念生活學，認同人應該放低內心嘅執着，活在當下，正面面對人生，佢仲話會將禪修得着應用喺工作上。唔知佢能唔能夠將禪味帶到立法會，令大家開會可以和平啲呢？