政情：搵劉翔過橋谷起港運會

政府早前發表耗資逾四百億元申辦二○二三年亞運會諮詢文件，立法會各黨派表態反對，社會各界都鬧爆政府倒錢落海但就唔肯花公帑扶貧，政府被迫延長諮詢期，但一般相信政府難以力挽狂瀾。

兩年一屆市民唔多覺

依家大家鬧申亞鬧到㷫合合，相信冇乜人記得明年五月舉行第三屆全港運動會，加上兩年一屆，除咗參賽者，市民已經冇咗件事。為咗谷起港運會聲勢，社區體育事務委員會主席周厚澄近日絞盡腦汁諗計做宣傳。

○七年港運會搵咗同係金牌得主嘅前體操王子李寧同「風之后」李麗珊為賽事燃點聖火，令港運會有啲睇頭，所以今屆點都要搵啲重量級體育精英助陣。咁明年五月第三屆港運會又搵乜人撐場先？有冇鎖定邊個係目標人物呢？

咁當然有諗過啦！周厚澄話初步都有諗過幾個人選，國家奧運金牌得主「欄王」劉翔係目標之一，如果劉翔肯拔刀相助，不但可加深港人對港運會嘅印象，並可吸引更多年輕人參賽。

若果劉翔肯嚟助陣，港運會當然會熱鬧好多，亦會谷起港運會嘅氣氛，到時可能會掀起一股跨欄熱潮添！咁就要睇吓周厚澄夠唔夠牙力請得郁劉翔喇！

今屆港運會嘅體育項目將增至八項，新增排球同五人足球兩項熱門活動，而且每區財政資助會加碼至四十四萬元，吸引力大增。周厚澄仲賣花讚花香，話港運會舉辦以嚟，參賽者人數增加至今屆嘅三千人，而青少年參與體育活動人數亦不斷增加，學校參加率更高達九成，達至普及體育嘅目標。

體育設施促如期完工

不過，對於政府申辦亞運觸礁，身兼亞運臨時申辦委員會成員嘅周厚澄就希望政府盡快解決受爭議嘅問題，例如將申亞開支同已計劃興建嘅體育設施開支分開處理，又警告無論政府係咪申辦亞運，已計劃興建嘅體育設施一定要按承諾如期完工，否則難以說服市民支持申辦大型體育賽事。