政情：田少捐名酒撐旅局活動

由旅發局主辦嘅香港美酒佳餚巡禮喺呢個月底再度開鑼，今年加設「名人名酒薈」項目，由名人同機構送出三支六公升裝法國靚紅酒，其中兩支更加係嚟自法國嘅一級酒莊，包括旅發局主席田北俊捐出嘅1995年Mouton-Rothschild紅酒，市值四至五萬蚊。

三支靚紅酒會分三日開瓶，供每日首一百五十名持有尊尚品酒證嘅人士品嘗，品酒證費用三百蚊，飲一杯已經翻本。

紅酒升值快過買樓

Mouton-Rothschild係法國五大酒莊之一出品，有出色嘅果香同豐富嘅口感。田少話支酒喺九五年釀製，儲存至九七年入樽，呢種六公升裝紅酒產量唔係太多，所以價錢由二○○○年購入至今已經升值一倍有多，佢笑言紅酒升值能力快過買樓。

田少又話買紅酒同買樓好相似，都係預早買定酒花，葡萄收成時就要扑錘同代理買貨，入樽後十八個月先運抵香港。

最近田少奪得十大衣着獎，原來已經係佢第二次攞獎，佢謙稱以佢依家嘅年紀，今次攞獎特別高興。