政情：搞搞政：張文拉華叔落水焗馮偉華上轎
如意算盤未必打得響
教協尋日首次搞茶敍，新舊會長張文、馮偉華除咗講小班教學外，當然觸及兩年後嘅立法會議席接棒問題，張文話曾經就馮偉華上任教協會長後嘅表現問華叔意見，華叔嘅回應次次都係一字記之曰：「好！」張文笑笑口咁話，華叔對佢反而諸多意見，以往兩人同任立法會議員時，張文喺會上發言後，就不時收到華叔傳紙仔：「你讀錯字喇！」搞到佢好大壓力。
兜嚟兜去，張文仲借華叔把口讚馮偉華、鬧自己，無非係想縛馮偉華上轎，競逐下屆立法會教育界議席啫！
雖然得到華叔肯定，但馮偉華話做教協會長已經有好多事項要處理，如果做埋議員，將會失去好多家庭時間，所以仲係要諗諗先喎。睇嚟張文出到借華叔把口焗馮偉華上轎呢一招，馮偉華都未必會就範，張文嘅退休大計唔知使唔使延後四年呢？