政情：新東新西各增兩席扶弱

當局早前向十八區區議會正副主席放風，話政府已經敲定二○一二年立法會直選維持五區，而政界最關注嘅係新增五個直選議席點樣分，事關會直接影響政黨嘅直選部署。據了解，政府傾向將其中四席均分畀新西同新東，令現已有八席嘅新西增至十席，新東亦由七席變九席，名副其實成為兩個巨無霸選區，勢成兵家必爭之地。

至於親中陣營最大政黨建仔早前曾倡議「六區方案」，建議將新西同新東拆細，再併合新增一個「新界北」選區。據聞，政府同西環最終都唔撐呢個方案，決定維持五區。

現行選舉制度比例代表制嘅遊戲規則，係選區議席愈多，愈有利細黨同獨立候選人勝出，以新西、新東為例，加到十席同九席後，候選人只需攞約兩萬票就可當選，加上競逐者眾，兵荒馬亂，弱方易趁亂突圍。相反，如果新界拆成三區，每區均分五至七席，直選實力較弱嘅富貴黨同獨立嘅龐愛蘭等就好大鑊，分分鐘全軍覆沒。

有資深親中陣營人士形容，呢套係平衡遊戲，令富貴黨前主席田北俊（或方國珊）同二少田北辰喺呢兩區收復失地，東山再起，亦好讓龐愛蘭喺新東有機會跑出，百花齊放，而非將所有雞蛋放晒喺一個籃內，令大黨嘅地區勢力愈嚟愈大。呢套平衡思維，將難免左右一二年建制派嘅直選布局。