政情：立會搞展覽議員鬥快閃

立法會尋日起喺港鐵香港站舉辦歷來第一次展覽，希望藉此拉近市民同立法會嘅距離。立法會主席、內務委員會正副主席，以及唔同黨派嘅議員合共八人，齊齊為展覽揭幕，不過揭幕儀式一完，唔少議員就快閃鬆人。

呢次展覽介紹咗立法會嘅歷史、架構、添馬艦立法會新大樓等資料，仲有「議員的一天」欄目，介紹議員平時點樣度過忙碌的一天，現場又有電腦遊戲畀市民認識唔同選區或者唔同界別嘅議員。不過展覽位處香港站收費區，有興趣嘅市民要畀咗車費先睇到。

為展覽剪綵嘅八個議員，只有主席同內會正副主席劉健儀、李華明留低，向嚟自馬鞍山宣道會台山陳元喜小學嘅三十幾位同學作講解，其餘嘅議員望吓個展覽就鬆人，莫非嫌展覽太悶？

今次展覽由禮拜一至禮拜五一連展出五日，期間會有議員到展覽場地同市民見面，至於乜嘢時間現身，秘書處就提供唔到，所以大家有冇機會見到佢哋，怕且要講緣分嘞！