政情：蔡堅重出江湖搵醫保祭旗

蔡堅重返香港醫學會出任新一屆會長，再次領導香港最大嘅醫生組織，重出江湖就發威，第一炮對準有「每周一鑊」之稱嘅食物及衞生局局長周一嶽所提出嘅自願醫療保障計劃諮詢文件，尋日仲以醫學會嘅整體決定提出十點意見，批評政府提出嘅醫保行唔通。

冇面畀鬧足三粒鐘

早喺政府向外吹風，話自願醫保計劃諮詢文件有乜嘢建議後，蔡堅就提過呢啲吹出嚟嘅建議係「魔鬼細節」，即係大家要睇清楚份諮詢文件，咪畀啲「有心人」誤導。

其實，政府為今次自願醫保搵過唔少團體放風，但只係同食衞局副局長梁卓偉食午飯，傾唔到啲細節。原來喺上個禮拜政府公布醫保計劃前夕，醫學會請咗周一鑊同梁卓偉食飯，聽政府嘅醫保方案。聽完之後，不單止冇畀周一鑊說服到，反而係冇面畀，蔡堅同醫學會一眾會董當晚炮轟咗周一鑊足足三粒鐘，之後再開會開到三更半夜，制訂對醫保意見初稿，但因未問過會員嘅意見，於是冇將初步意見放出街，等會董各自收集意見後再公布。

細仔婚宴不忘收風

唔講唔知，蔡堅前日第二次「升呢」做老爺，請咗幾十個醫生去佢細仔嘅婚宴。佢話啲老友嚟飲，恭喜佢，佢當然唔放過機會，八卦吓佢哋對醫保嘅意見。

有兒歌醫生之稱嘅醫學會副會長陳以誠前晚都有去賀蔡堅，佢同蔡堅各自搵醫生收料，聽吓佢哋對醫保嘅意見，跟住收收埋埋喺尋日開記者會前再傾個最終版本，而且喺大部分會董都同意下出街，只有個別一兩個會董反對。

咁又係嘅，幾個人嘅意見好單薄，亦唔可以代表整個醫學會嘅立場，收集會員意見係好重要嘅一環，但勢估唔到蔡堅連喺娶新抱嘅宴會都唔放過，不忘收料。

都係穩陣嘅好，蔡堅今次大包圍式收集意見，而醫學會內亦以壓倒性之勢反對自願醫保計劃，咁政府就冇機會抽醫學會後腿，亦冇可能分化到醫學會啲會員啦！