面對政府的自願醫療保險計劃，我也有以上的感悟。政府標榜人人受惠，坦白說，有錢人唔會騷你，亦冇必要睬你；有能力的中產本身已有醫療保險，亦唔會有興趣；真正有需要的一族，如在職貧窮及一百二十六萬窮人，但保費隨年齡而增加，六十五歲或以上長者保費無上限，變相將老弱人士淘汰出局。所謂人人受惠，又係得個講字，「十全醫保」被有識之士喻為天仙局，並非誇大之談。

政府刻薄長者，除了唔肯放寬生果金離港限制外，想唔到連有五百億基金嘅自願醫療保險計劃都要欺壓長者，試問中國人的敬老仁風何存？政府鼓吹的關愛文化在哪裏？

明眼人都睇得出，政府此招主要是推卸公共醫療責任，而納稅的中產最後連公共醫療都冇埋，最終得益的又係名醫、私家醫院及保險公司。真正需要醫保的長期病患者、已經捉襟見肘的老弱貧苦一族，你要再榨佢哋幾百蚊？這不是向石頭要血是甚麼？政府良心良知良能何在？

把五百億投入公共醫療服務吧！增聘多些前線員工如護士醫生，添多些先進儀器，炒掉高薪廢噏的高層，效果必立竿見影。所謂「十全醫保」，筆者只覺人生之難不在於拐彎之處難於抉擇，而在於無論朝哪邊拐，日後都會懊悔不已。周一鑊個膊已夠晒斜，再斜落去，一滑落懸崖，便成千古恨矣！