理財係人生必備嘅知識，近年教育界好重視理財教育，滙豐銀行早前搞咗個少年財務策劃師大賽，唔少參賽嘅高中生年紀輕輕已經識得點樣理財。不過，擔任呢項活動嘅頒獎嘉賓、教育局副局長陳維安（Kenneth）就話，佢細個時完全唔知乜嘢叫理財，所以對高中生嘅能力嘆為觀止。
今年四十五歲嘅Kenneth自爆二十年前啱啱踏入社會做嘢，先初嘗擁有第一張提款卡嘅滋味。佢話自己當年要處理嘅「財產種類」只得現金一種，基本理財知識亦係大學、甚至係修讀碩士學位時先掌握到，今次驚見一班中學生你一言我一語，討論點樣將資金分配去獲取最大利益，不得不感嘆世界已經唔同晒。
Kenneth話，年輕人早啲學識理財係好事，但自己嘅大仔今年只得十三歲，學理財仲係太早。佢認為教仔女理財最好係用「身教」，仲笑言自己同囝囝去買牙膏，都會趁機教佢點樣先買得其所喎！