立法會新一年度工作啱啱拉開序幕，秘書長吳文華（Pauline）明年屆六十歲，照計夠鐘退休。但近日有消息話，立法會行政管理委員會成員有心要Pauline留任，等立法會新大樓二○一二年啟用時，佢可以一手一腳搞搬遷、入伙等事宜。Pauline對份工作咁投入，再踩多一round一定冇問題啦。巧妙嘅係，早前立會修例廢除秘書處六十歲就要硬性退休嘅規定，可以視為幫Pauline連任解除一道緊箍咒。
Pauline○八年尾接替馮載祥出任立會秘書長時，已經五十七歲，佢上任之後，全面接手立法會新大樓嘅籌劃工作，由設計、裝潢，以至人手安排都包辦晒，好似湊baby一樣。所以有行管會成員覺得新大樓啟用後多咗咁多新員工，如果秘書長又換人，要跟工作都需時，驚未必壓得住陣，有意畀任內表現唔錯嘅Pauline留任。
不過亦有成員擔心咁做會影響接班問題，曾經提議Pauline交棒畀助理秘書長林鄭寶玲或者法律顧問馬耀添，但佢哋一個只係首長級第二級、即D2，一個又專注法律工作，接任秘書長未必適合，卒之行管會提議畀Pauline續任一年，又或者喺約滿後改以顧問形式聘用佢，等佢可以掌舵處理新大樓嘅過渡安排，嚟緊行管會將開會討論，預計冇人會反對。