好多人都鍾意飲紅酒，但飲到要開酒莊嘅就唔多。福建幫施子清兒子、百仁基金主席施榮忻（Jaime）一向鍾意飲酒，○八年政府取消紅酒稅之後，佢睇好紅酒業嘅發展，聯同全國青聯常委林富強同菁英會副秘書長王文博，合資二千幾萬喺灣仔開設酒莊，以「老佛爺」（Vin Lafayette）命名。
老佛爺酒莊位於灣仔皇后大道東八十號堅雄商業大廈一樓，面積千幾呎，內部裝潢設計高尚優雅。酒莊內大部分藏酒均嚟自法國一級酒莊，包括Latour、Lafite-Rothschild、Margaux等，而Burgundy（勃良第）同Rhone（隆河區）嘅佳釀亦包羅其中。酒莊裏面仲有一間三百幾呎嘅多用途房間，可供租借作為婚禮或會議用途。
為方便顧客選購紅酒，酒莊內所有紅酒都列出世界著名酒評家Robert Parker（RP）嘅評分，而所有藏酒都有九十分以上。
Jaime話，品酒唔一定要追求貴價酒，有時平酒都有好高嘅評分，佢介紹嘅抵飲紅酒包括Cote Rotie La Landonne,Guigal 1990同1991，分別獲100分同99分。