港股近日重拾升勢，恒生指數唔單止一度衝破二萬三千點，成交額仲大增添。各路股市明燈開始登場，曾經自嘲喺股災中成長嘅恒豐證券董事總經理張華峰尋日都有開腔，仲變身大好友，睇好恒指年尾有機會升到二萬五千點。
張華峰尋日出席上海財經大學香港研究生教學點開幕禮，講到港股表現，佢話保守估計恒指年尾會升到二萬五千點，原因係美元貶值，歐洲資金冇出路，自然流入亞洲投資，特別係投資內地同香港股市。
至於中港兩地小市民都關心嘅樓市前景，張華峰就有獨到見解，佢話全中國包括香港嘅適婚年齡人數高達七百萬人，好多人結婚後自然會置業安居，樓宇需求好大，所以兩地樓市會穩步上升，加上國家繼續努力刺激內需，相信未來發展勢頭相當好。