施政報告呢個禮拜出籠，政府啲準備工作亦去到衝線階段，尋日雖然係周末，我哋都喺中環見到特首辦特別助理陳岳鵬（Ronald），見佢似乎若有所思咁，原來係為咗施政報告嘅安排趕工，諗到出晒神。
周末嘅中環置地廣場充滿悠閒氣氛，不過，人海中一身便服嘅Ronald卻係另一副表情，只見佢一路行一路眉頭深鎖，冇耐一個箭步行去太子大廈嘅「Canteen」，原來係買快餐醫肚。我哋問Ronald諗乜嘢咁入神，佢解釋施政報告禮拜三就出籠，佢仲諗緊啲相關安排，所以冇注意身邊嘅事。
佢仲話，啱啱喺對面海開完會，打算拿拿臨食個快餐，然後打道返特首辦做嘢。身為官場新貴嘅佢飲食都好簡單，捧住個餐已經笑晒口，快啲呀，食完仲要返office留堂㗎！