滙控執行董事鄭海泉冇見多時，日前終於重出江湖。原來請假兩個月接受治療嘅鄭大班已經病愈，前日同太太鄭曹志安去中環一間酒店食飯撐枱腳，見到我哋時，仲面帶歡笑咁同大家報喜：「啱喇！你幫我同全世界講，我冇事，好番晒喇！」
病愈後嘅鄭大班睇嚟精神唔錯，只係清減咗好多，面容亦冇以前咁飽滿。佢話目前正處於調理身體嘅階段，而且個人特別容易攰，但整體情況好理想，叫大家唔使為佢擔心。至於係乜嘢病，鄭大班自始至終都冇透露過。
今年五月中，滙豐內部突然傳出鄭大班請假兩個月，身為滙豐中國董事長嘅佢，連六月初喺上海舉行嘅滙豐新中國總部開幕儀式都缺席，難怪佢患病之說甚囂塵上。難得重出江湖，鄭大班尋日都不忘透過我哋向關心佢嘅朋友傳話：「我返咗成個月工喇，只係冇人知之嘛！」