中美兩國近日就人民幣匯率招來招往，貨幣戰成為全球關注嘅議題。財爺鬍鬚曾日前訪問英美，行程夠晒高規格，同美國及歐洲金融界嘅主要峰層人士見晒面，但佢結束訪問嘅聲明卻十分冇料，只係一句「出席會議有助香港了解情況」就當交貨，好似睇唔到貨幣戰嘅火球衝緊嚟咁。政府係冷冰冰定後知後覺？只有事後至知，金管局前總裁任志剛尋日已敲響泡沫警鐘，政府同投資者都要打醒十二分精神至好。
會面人士皆屬猛料
鬍鬚曾此行主要係出席國際貨幣基金組織同世界銀行年會，由於華盛頓集合咗世界各地嘅中央銀行家、財政同發展部長，所以鬍鬚曾連日來都分別見過美國聯儲局主席伯南克、白宮國家經濟委員會主席薩默斯、歐洲央行行長特里謝等，會面嘅人士十分高層次。中美因為人民幣匯率拉鋸，搞到貨幣戰陰霾覆蓋全球，外間都關注鬍鬚曾此行有乜嘢收穫。
但佢尋日結束華盛頓嘅訪問，總結行程時一句貨幣戰都冇提過，亦冇發出任何警告，只係輕描淡寫咁話參加會議對香港了解國際金融形勢同外在環境有利，對環球都好緊張嘅金融大事毫無表示。
日圓升值前車可鑑
不過，本地金融界就好關注件事。東海聯合集團主席黃楚標唔同意人民幣急劇升值，話即使人民幣每年以百分之二嘅增幅調整，即係十年升兩成，佢都覺得太多。佢又話，美國以高稅率對付中國，自己一樣受害，亞洲好多地區嘅成本都好低廉，美國嘅問題絕唔係解決一種幣值就掂。
亦有財經界人士話，日圓被美國逼升值，結果一衰就衰咗二十年，依家美國將目標轉向中國，真係令人好㷫。佢認為人民幣即使要升值，都應緩慢調整。