身兼北京市政協委員的東華三院總理李鋈麟（Alan）含着金鎖匙出世，父親是兩間大型舊式雜貨舖老闆，衣食無憂，生活充裕。惟他的大少爺身份，卻於十多歲時結束。由於大型超級市場冒起，父親經營的雜貨舖難抵衝擊，終告倒閉，轉眼一無所有。他憶述：「要搬去木屋住，成日排隊輪飯輪粥！屋企窮，我讀到中三就輟學，返學機會留畀兩個細佬，我同阿爸不斷幫人打工。」

「個天要你捱苦就要面對」

「真係好大打擊！但阿爸教落唔使怨，個天要你捱苦，就要面對。」Alan記住父親金石良言，兩父子不介意由天堂跌落地獄，父親做洗碗工和糧油舖的跑腿；Alan也腳踏實地打工，做過送貨、送點心、車房仔，直至十八歲，經姨丈介紹加入船廠。這個轉變有如天降神迹，船廠老闆供Alan修讀輪機文憑課程，讓他得圓讀書夢。而他後來在船廠的發展也相當順利，累積不少好經驗，帶領他踏上成功路。

Alan後來轉投保險界，原因是睇通做船廠的發展局限：「我好清楚老闆去到盡搵嘅錢唔算多，所以辭職。冇人諗到船廠仔有能力做保險，老闆都唔支持我。」但是，Alan將不可能變成事實，在保險界投放十年光陰，賺到第一桶金，此時，雄心壯志又發作：「保險每年最多賺四、五百萬，人要進步，我又要搵新搞作！」

「人在天堂 錢在銀行」

Alan透過投資獲利，到男人三十又轉型做生意人。估佢唔到，竟做牧牛生意，引入胚胎繁殖母牛技術，於北京順義開牧場，養數萬隻乳牛，再將生意售給內地牛奶製造商。其實，他不只鍾情畜牧：「我乜都做，房地產、皮草、食品，有上市潛力就試！」至今他擁有二十項不同類型生意，名副其實白手興家。

「人在天堂，錢在銀行。」Alan說錢財死後帶不走，故他夠膽揼本投資，更不介意大筆用於慈善。香港戒毒會、再生會都是他捐款目標機構。他最愛幫年輕人：「我捱過苦，上天畀好多機會我翻身，我唔會放棄年輕人。」

他常常話當年，少不更事的後生仔都被其艱苦經歷所感動。Alan不止教人，更毫不吝嗇，樂於做生意顧問：「後生仔想做生意，可以搵我傾，我先判嗰盤生意係生定死，如果有作為，我唔介意投資。」幫人幫到底，並非人人能做得到。