前日有團體為立法會上個會期「埋單計數」，評估各議員過去一年嘅表現，其中專業會議嘅立法會議員梁美芬被指過去兩年喺一啲重要議案上共投下三十二次棄權票，懷疑藉此明哲保身。梁美芬尋日喺電台節目上辯護，話喺立法會嘅計算上，棄權等於反對，否認自己係逃避責任或者揸唔定主意。
梁美芬解釋，有啲事件唔需要完全反對，但又未游說到佢贊成，咪投棄權票囉！以高鐵議案為例，佢係西九新動力召集人，呢個組織共有三十名區議員，佢哋內部經過多次激烈嘅討論，最終未有共識。無論佢投贊成定反對票，西九新動力都會面臨分裂危機，所以佢就投咗棄權票。
佢又辯解話議會容許以棄權表達意見，有反對、贊成同埋棄權三個掣選擇，佢對一啲未成熟嘅議案投棄權票，唔覺得有乜嘢問題，又話自己出席率好高㗎！