尋日下晝喺福建社團聯會新會址啟用酒會上，肥仔張、方剛走後半小時，Miriam先至到，佢離開後，田北辰先現身，以「腳駁腳」形式捧場，當然係想避開傳媒嘅尷尬追問啦！

被記者問恨唔恨做富貴黨副主席時，田二少話如果黨友想畀個名分佢，佢唔會拒絕，但強調一切須跟足黨內程序進行，又指肥仔張如果就最低工資水平同黨嘅立場有異，立法會投票時可申請豁免，唔使卸任副主席咁話。咁講法，即係黨高層已對副主席易將消息外洩敲定對策，一切低調同放慢處理，減低事件對黨形象嘅衝擊。

果然，黨內六巨頭尋晚商討「有關副主席辭職」，並冇按原定計劃一錘定音敲定由田二少晉升副主席，話仍要聽聽黨內意見，即係忽然歎慢板，拖慢田二少嘅黃袍加身。

Miriam仲話六人冇討論過肥仔張辭任副主席一事，而肥仔張點諗，佢叫記者問番肥仔張喎。可惜嘅係，直至截稿前，肥仔張都冇回覆我哋，想問清楚都苦無機會。