衞生署尋日舉辦「健康有計 適飲適食齊起動」活動，推廣全民健康飲食同運動，預防心臟病、糖尿病等非傳染病，署理食物及衞生局局長Gabriel梁卓偉、食物環境衞生署署長卓永興以及康文署署長Betty馮程淑儀等都有出席。
活動其中一個環節邀請咗香港餐飲聯業協會會長黃家和上台代表業界分享吓健康飲食心得，佢話以前啲飲食業界會以為「多鹽、多糖、多油」煮嘅食物先會好味，但呢個想法已經「過期」，仲話識得「三少」咁健康嘅食客先識食。
點知佢講得興起，居然喺台上篤爆署理局長同署長嘅腰圍：「以我經驗，就咁睇Gabriel同馮程淑儀條腰應該得二十八、二十九吋！幾Slim（苗條）！不過卓永興我估佢都有三十八吋腰喎！哈哈哈！」即時全場爆笑，Gabriel亦只好報以尷尬微笑。