高錕雕像造型自然簡單，身穿西裝西褲，雙腳微微分開企，面露微笑，加上雕像左手插褲袋，盡顯高錕型仔嘅一面，完全符合晒高太前日接受電台訪問時提到，要個雕像型仔同自然嘅要求。高錕顯然都好滿意個雕像，不時望住雕像微笑，同一眾嘉賓、雕像合照時，仲同雕像一齊插袋。

高太喺典禮上代表高錕致詞，話好榮幸高錕雕像可以喺校園畀每一代學生得悉佢嘅事迹。吳為山致詞時就話高錕嘅神韻好難掌握，而因為多年前被高錕慈愛嘅微笑深深影響，所以雕像都要有笑容，以表現高錕對世界嘅仁愛之心。中大校長沈祖堯喺儀式尾聲就送咗一張雕像嘅相畀高錕留念。