28/09/2010

政情:福建社聯搬竇變拜票P場

政黨打直選戰最緊要選票,親中政黨唔敢怠慢,但要凝聚選票或掘票,邊得嚟咁多人力物力?所以好多時都靠「外援」。

殺入建制派票倉北角

過往喺港島直選中充當建制派掘票機器大後方角色嘅福建社團聯會換會址,由上環搬入「小福建」北角,新會址尋日揭幕啟用。福建幫正式殺入福建大票倉,下年區議會選舉同後年立法會選舉,建制派要喺港島掘票、數票、拉票同催票,就更加就手嘞!

福建社團聯會舊會址喺上環,以長期租賃形式設置,年幾前就豪花近三千萬元,買入呢個位處北角嘅九千幾呎新會所,地方大咗四倍,除咗大禮堂,仲有幾間會議室,以後開會、聚餐、搞文娛活動凝聚鄉情,甚至搞選舉誓師大會或者設立選戰臨時拉票總部,都唔驚冇地方。

聯會呢個被視為福建票「票倉」嘅新會址,一眾對選票敏感度極高嘅建制派政黨,尤其有意喺區議會同立法會選舉進軍港島區嘅有心人,紛紛聞風而至,好似建仔主席譚耀宗、富貴黨主席劉健儀、經濟動力Jeffrey林健鋒同「蘇菲」梁劉柔芬,以及匯賢智庫葉劉淑儀等政團頭目由頭坐到落尾。聯會主席林樹哲同幾位頭領楊孫西、施子清同盧文端滿場飛招呼賓客,握手握到手軟。

現場亦有唔少高官捧場,民政事務局副局長Florence許曉暉前日喺《城市論壇》以請飲嘢同甜美笑容溶化一班「維園阿哥」,畀班阿哥撩話靚過未做副局長之前,Jeffrey同蘇菲尋日一見Florence,意有所指咁大讚Florence「真係靚咗好多喎」,搞到Florence一味傻笑。

市值帳面賺六百萬元

聯會新會址除咗吸票,仲識吸銀。據悉,新會址啱啱投入運作,市值已經升咗一成半至兩成,帳面賺咗約六百萬元,相當和味。

Money18 新功能「18好路數」為你預測心水股票升跌機會率