據估計，全港六千幾個持牌導遊當中，劏客嘅只有百幾個。但係唔好睇小呢啲敗類，正所謂一粒老鼠屎可以整臭一鍋粥，佢哋嘅劣行已令香港旅遊業名聲掃地。

近排黑導遊同黑店聯手劏客嘅事幾乎無日無之，劏客手法更係愈嚟愈奸狡。呢，早前有個內地商人光顧尖沙咀一間海味店，買咗九千幾元藥材，海味店職員碌卡時居然喺銀碼後面加多個零，變咗九萬幾元。個客去到深圳後發現上當，返轉頭要求回水，但店方賴死唔肯，客人投訴無門、叫苦連天。

旅遊業議會為咗打擊劏客黑店，決定派臥底扮旅客放蛇。呢一招深圳當局以前都用過，但係收效不彰，事關本港黑店一般搵外省客埋手，較少劏廣東團。有見及此，今次旅議會決定喺其他省份派臥底報團。

話時話，派臥底放蛇確係高招，中央電視台曾派記者扮團友，將本港黑店劏客嘅過程喺電視曝光，令黑心商人無所遁形。本報以前亦曾多次建議政府用放蛇方法打擊黑店，問題係旅遊業議會只係一個業內人士自律組織，就算放蛇查出問題，都要政府跟進處理，如果政府關人個關，肯定半途而廢。

講到呢度，又要叮吓本港嘅旅遊管理體制嘞，簡直七國咁亂！嗱，官方嘅旅遊事務署只負責管理景點同旅遊設施，半官方嘅旅遊發展局又只負責宣傳推廣，監察嘅重任反而由非官方嘅旅議會負責。咁嘅架構，簡直係本末倒置，係咪好搞笑呢！

太一叮諗唔明，政府口口聲聲話要將香港建成國際旅遊中心，但點解唔可以學澳門同內地，設立一個部門專責管理旅遊業？點解要假手非官方組織？當局可以派臥底扮乘客捉泥　的，點解唔可以派臥底放蛇打擊劏客黑店？一句到尾，監管旅遊業咁大件事，政府點可以側側膊，闊佬懶理？

叮佢個鎯鎯！政府遲遲唔撥亂反正，坐視一小撮黑導遊聯同黑店作惡多端，破壞本港旅遊業聲譽，令所有旅遊從業員蒙羞，點對得住謝廷駿在天之靈呀！