「法巴之花」郭小菱（Shirley）是法國巴黎銀行股票及衍生產品部董事，今年再升職，兼任銷售及推廣部主管，經常上電視推介窩輪，又游走香港、內地和新加坡出席投資講座，她也直認工作壓力大：「做呢行，市場觸覺要好敏銳，依家有二十幾間窩輪發行商，競爭大咗，又要交足功課畀老細，睇吓賺得夠唔夠，呢啲都係壓力，不過做得好，滿足感亦好大。」
媽咪教買樓投資
Shirley○五年加入法巴後平步青雲，年紀輕輕便打響名堂，與她「幼承庭訓」不無關係。她的父母均從事金融業，小時候家裏更有個「金魚缸」。她笑說：「屋企有一排電腦用嚟睇股市，同學仔見到都嘩嘩聲。」升上中學後，父母鼓勵她「虛擬」投資股票：「Daddy叫我去證券公司做暑期工，我就試吓睇市，學習把握出入市時機。雖然唔係真金白銀投資，但我都好想賺取回報。」
身處金錢世界，Shirley是否大花筒？她笑得燦爛：「唔會啦，自細媽咪已經教我儲蓄，金融海嘯後，睇到好多朋友失業，更明白儲蓄嘅重要。」她記得第一次出花紅，本來想買架靚車，但被母親阻止：「媽咪覺得嘥錢，叫我將筆錢買樓投資，所以我到依家都未有車。」
自此之後，買樓成為Shirley投資之道：「我主要買特色單位，會諗埋室內設計，花啲錢裝修提高租值，有七、八厘回報㗎。」
寫Blog講時裝減壓
不談工作，她最愛寫Blog。「我本身好鍾意時裝，今年開始寫Blog，講吓呢季興啲乜。寫Blog係減壓好方法，見到愈來愈多人睇我個Blog，又有廣告贊助，係一種成功感。」Shirley在Blog內形容自己是個熱愛時裝和美食的人，更提及感情狀況，關心她的朋友大可上她的Blog看看。
郭小菱 Shirley 小檔案
學 歷：美國喬治華盛頓大學計算機及日本語言雙學位
現 職：法國巴黎銀行股票及衍生產品部董事、銷售及推廣部主管
興 趣：運動、烹飪、寫Blog、扮靚、旅行
入行難忘事：接聽熱線時曾遇爆粗客戶及變態騷擾電話
網 誌：styleinkhk.com