鬍鬚曾形容此行係「灌溉之旅」，灌溉乜嘢？可能係廣東話啩，事關鬍鬚曾喺冇乜人識聽廣東話嘅台灣都致力捍衞廣東話，李大壯亦一樣，直到有台灣記者問佢怕唔怕一旦民進黨再上台，會影響港台交流，李大壯先轉台，話不論國民黨定民進黨掌權，台灣人都要食飯，台灣官員亦唔會做違背台灣人意願嘅事。佢用廣東話嚟推動港台交流，係咪好奇怪呢？

講番次行程，鬍鬚曾原定尋日同台灣行政院院長吳敦義會面，行政院官員尋日朝早都話，鬍鬚曾原定尋日朝早九點拜會吳敦義，但撞啱三個颱風夾擊台灣，吳敦義要臨時隨同總統馬英九去颱風應變中心視察，所以取消會晤。鬍鬚曾出門因天有不測風雲而行程受阻，唔係第一次，今年初佢上京同中央政府財金官員會面，就撞正刮大風雪而取消，今鋪去台灣又遇上三颱夾攻，呢啲係咪人算不如天算呢？