奪滬電影節最佳男配角

葉準日前應邀隨建仔嘅「橄欖」陳鑑林搞嘅佛山團，去葉問堂學詠春、孔聖園拜孔子。葉準啱啱憑《葉問前傳》嘅演出勇奪上海電影節傳媒大獎最佳男配角，話題自然離唔開戲。佢話，喺《葉問前傳》飾演媽媽嘅黃奕都好靚女，但係熊黛琳嘅氣質更加似，而且，現實生活中嘅葉媽媽的確係高過爸爸葉問嘅。

今年已經八十六歲嘅葉準一抵達佛山梁園，成班慕名前來嘅徒子徒孫即跪地行禮，似足葉問電影裏面嘅場面。橄欖同葉準同行，有冇討教一招半式呀？橄欖話，有向葉師傅討教詠春……精神，好似中庸之道同強不凌弱咁，但係就冇學到拳腳功夫。詠春迷聽到佢嘅答案，肯定大嘆嘥料！