前教統局局長李國章今夏喜事重重，繼上月到美國參加姪仔同兩個好友仔女嘅婚禮後，近日佢喺美國做醫生嘅孻仔李文俊（Peter）夫婦喺二十四號誕下一名千金，首次做阿爺，李國章梗係笑到見牙唔見眼啦，仲親自幫孫女改中文同英文名。
李國章嘅細新抱係希臘人，按當地傳統，生女改名要跟嫲嫲或婆婆嘅英文名，李國章太太叫Diana，如果孫女又叫Diana，可能會有啲亂，所以佢寧願孫女跟婆婆叫做Athena；至於中文名，李國章好開心咁話：「中文名叫『德麗』，有品德又美麗，加埋Athena嘅智慧，就夠晒好啦！」嘩！美麗與智慧並重，咪有資格選港姐？李國章就話呢啲遲啲先至講喎！
據講李國章嘅大仔Alex結婚冇耐，幾時有造人大計？李國章話要等Alex自己決定喎！佢又話，原本可以留喺美國抱孫，但醫學界前晚為行政會議成員「金刀梁」梁智鴻慶祝榮獲大紫荊勳章，日內佢又要陪TVB揸弗人「六叔」邵逸夫同「六嬸」方逸華北上內蒙、寧夏同蘇州巡視教育工作，所以專程返香港，遲啲再去美國探望孫女。