近排樓市熾熱，豪宅再成焦點，尋晚香港青年聯會第十八屆會慶及會董會就職典禮喺會展舉行，好多城中青年名人都有出席，曾經喺天匯交易中備受矚目嘅青聯副主席秦善文都在場，但佢話同天匯已經告一段落，唔想再提，加上佢覺得連政府都叫大家要審慎入巿，所以佢都持觀望態度。
唔講樓市，秦善文就開口大講四個月大、有十八磅重嘅囡囡，佢話個女好腳頭，事關自從囡囡出世之後，佢生意好到不得了，所以就算要幫手湊女佢都湊得好樂意。佢仲有個兩歲大嘅囝囝，佢大讚囝囝記性好，排英文字母同數目字都冇難度，咁啱佢老友記、青聯顧問曾智雄最近都再做爸爸，生咗個囡囡。照計兩家人咁熟，話唔定小朋友青梅竹馬，將來會情投意合喎！不過秦善文一聽到就話冇可能，事關曾智雄係佢個仔嘅契爺，佢亦契咗曾家「小公主」做契女，變相兩個小朋友係兄妹關係，所以都好難做到親家親上加親。
主禮台上仲有一排冇見嘅青聯副秘書長范駿華，儀式一完，佢就喺人群中消失咗。