最低工資已經成為城中勞資最關注嘅話題，日前傳出臨時最低工資委員會已經得出時薪二十八蚊嘅共識後，各界議論紛紛，富貴黨中委田北辰對呢個講法嘅反應好直率，有啲疑慮咁話：「二十八蚊？會有九至十萬人失業噃！」
田二少尋日話，佢哋黨早前做過一個調查，如果時薪訂喺二十八蚊嘅水平，估計本港就業市場會受到好大打擊，九至十萬人甚至會失業。商界人士對數口一向好敏感，富貴黨立法會議員張宇人年初講時薪二十蚊時，已經引嚟勞工界一輪狠批，依家田二少又有新憂慮，可見富貴黨的確緊貼呢個議題。
商界反應強烈，勞工界亦唔見得收貨，有勞工界議員明言，唔會接受時薪少於三十三蚊，睇怕最低工資建議引發嘅激戰已經揭開序幕，勞資新一輪鬥法亦避無可避。