講究飲食係一種生活追求，成日中港兩邊走嘅富力地產董事長李思廉對兩地嘅飲食文化認識頗深，尤其富力喺內地經營四間五星級酒店，包括廣州富力君悅大酒店同埋Ritz-Carlton等，難怪佢對餐廳嘅要求極高。早前富力業績發布會後，我哋就問李董有乜飲食心得，佢盛讚ifc嘅日本餐廳稻菊（Inagiku），必食之選係大蜆天婦羅同日本蝦天婦羅。
李董果然係識食之人，事關超過一百二十年歷史嘅稻菊，正係靠天婦羅奠定江湖地位。依家稻菊喺香港有兩間分店，好多城中名人都係稻菊嘅捧場客。
李董至愛嘅大蜆天婦羅，係精選日本關東大蜆，加入日本椎茸菇同埋三葉碎後油炸，香甜蜆肉喺鮮甜多汁嘅椎茸菇完美配搭下，食落令人回味無窮。至於備受歡迎嘅日本蝦天婦羅，係以日本老虎蝦佐以優質芝麻油炸至金黃色後上碟，並備有海鹽、檸檬汁或天婦羅汁任君選擇，每隻一百五十蚊，個個都食到舔舔脷。