「老香港」唔多識中文

暑假結束，香港賽馬會尋日亦迎來新一頁。佢哋尋晚舉行周年大會，原主席陳祖澤正式交棒畀第一副主席施文信，換莊之後，馬會主席同行政總裁都由外籍人士出任，既打破過去十幾年華人做馬會主席嘅慣例，更罕有出現外籍人士一統馬會嘅局面。呢對外籍拍檔尋日已經雙聲道發警示，施文信要港府下放海外談判自主權以發展新業務，應家柏就關注港人博彩金額流向澳門，睇嚟呢對拍檔嘅主要挑戰就係對抗博彩收益下跌。

施文信尋日接班後，就大講佢同馬會嘅關係，原來佢七○年已經來港定居，娶咗個華人老婆，兼且有個囡囡添，九九年開始做馬會董事，○八年獲選做董事局副主席。雖然嚟香港幾十年，但佢都承認唔多識中文，仲有啲尷尬咁話唔係幾好意思。尋日周年大會亦選出香港體育學院主席李家祥接替退任嘅原馬會主席陳祖澤，成為馬會大董之一。

本身係特許會計師嘅施文信話好欣賞馬會嘅慈善工作，將來亦會維持依家嘅方向。做得馬會主席，施文信當然係馬主，依家以「欖球團體」經理人身份有一隻受咗傷嘅團體馬叫做「欖球樂園」，佢尋日仲話，自己都有打算做馬主，但仍喺抽籤階段。

90年代起做公職

今年六十三歲嘅施文信，係少數熱心投身公職嘅外籍人士，除咗係滙豐銀行非執行董事，亦係公務員敍用委員會成員。施文信八一年起加入香港安永會計師事務所，九九年十二月退休時任安永嘅主席同首席合夥人，九六年做過香港會計師公會會長。

由九十年代開始，施文信開始參與公職，九八年出任證券及期貨事務監察委員會非執行董事，亦曾經做過證券及期貨事務上訴委員會委員。○三年，施文信出任「維港巨星匯」嘅獨立調查小組成員，亦都做過地鐵非執行董事，名副其實百足咁多爪。