政府啱啱公布五十三幅唔受規劃管制嘅郊野公園私人土地，原來有部分已經變咗違規骨灰龕。其中鄰近北大嶼山郊野公園嘅地塘仔有幅面積約三十萬平方呎嘅地，舊年畀人用八百幾萬買嚟建地底龕堂。地政總署指有關項目違反地契，多次向地主發出警告，但對方一於懶理。警告無效，當局日前決定將幅地充公。

政府早就應該做嘢啦。現場一帶本來係佛門寶地，除咗寶林寺同羅漢寺，仲有廿幾間靜室同禪院，最啱清靜禪修。出家人擔心建成地底龕堂後人多車多，交通不勝負荷，曾發起聯署行動，當局初時冇乜反應，近排至突然發威。

叮！拖咗咁耐至出手，遲到總好過冇到。弊在已經有兩百個骨灰雲石箱搬咗入去，可提供四百個龕位。如果龕位已經賣出，中咗招嘅市民點算？假如當局主動啲，早啲介入，又點至於搞成咁吖？

冇錯，加強龕位監管，打擊違規行為，港人一定會撐。問題係，市民百年歸老之後死無葬身之地，完全係政府一手造成。嗱，過去十年間，當局提供嘅公眾骨灰龕位只佔同期火葬宗數一成四，加埋非牟利機構提供嘅骨灰龕，都只係佔四成，即係話另外六成火葬嘅骨灰難以入土為安。死者輪候骨灰龕位時間，居然仲長過生人輪候公屋時間，你話係咪荒謬吖？

叮！問題出喺政府身上，但當局除咗齋講承諾，就係推卸責任，舊債未還，又添新債。「檢討」一大輪，諗出個十八區「區區有骨灰龕」嘅絕世好橋。政府耍下太極，港人嘅「身後居所」就變咗「地區問題」，要自己搞番掂，咁咪又係擺明搵市民笨？

政府隻眼開隻眼閉，私營骨灰龕愈開愈多，氾濫成災。地塘仔違規地底龕堂不過係冰山一角，前排就有發展商將沙田赤坭坪兩間村屋改建為骨灰龕，被村民指破壞風水，引起連串強烈抗議，地政總署先至以「佔用官地」為由，對違規者採取行動。

話時話，將違規使用土地充公，只治標唔治本。政府要妥善解決問題，只有一條路，就係主動承擔、排除爭議、營造共識，以最大努力增加龕位供應。鋪鋪都將責任推番畀社區，納稅人高薪厚祿請班高官返嚟做乜？

盂蘭節就快到嘞，農曆七月地府中門大開，陰間鬼魂湧晒出嚟，今年唔知會唔會多咗班因為「僭建陰宅」而被迫遷嘅無主孤魂呢？唉，佢哋自己都無法安身，又點保佑陽間親人家宅平安吖。叮！