花名「獅子」的吳謦燃只有二十二歲，今年中大政治及行政學系畢業，是陳淑莊立法會議員的助理，也是公民黨青年公民執委，現正攻讀倫敦大學LLB法律課程，「希望將來做維權律師。」

吳謦燃立志做維權律師。	放大圖片	放大圖片

覺悟　朽木原來可雕

這個胸懷大志的男孩，從前卻十分反叛。「阿爸做製衣廠管理層，我小學時，阿爸已經去外國做嘢，升上中學後，媽咪就過埋外國陪阿爸，我自細已經無王管。」他是家中孻仔，對上有兩個年紀大他一截的家姐，父母為了搵食，一年只回港一、兩次。冇父母喺身邊，升上中學之後學人食煙、講粗口、唔返屋企。

「獅子」考試考全級尾十幾，老師認定他是不可雕的朽木，父親每次回港都和他吵架，父子關係惡劣。中三那年的聖誕節，他又和父親「吵大鑊」：「阿爸嗰次竟然鬧到喊，之後佢就返咗外國開工。我從來未見過佢喊，嗰刻開始諗，阿爸一年先返嚟一次，為乜要搞到佢咁唔開心？」

飛躍　考包尾變第一

猛然醒覺，「獅子」發憤讀書，成績突飛猛進，中四升讀文科精英班，中六更考獲全班第一。他笑道：「我個人幾反叛，人哋睇死我唔得，我偏要做到畀你睇！」現在父子關係融洽：「識得對阿爸感恩，感激佢為咗家人付出咁多。」

投身政黨，與○三年七一大遊行有關。當年政府硬銷廿三條，只有中三的他，覺得政府好霸道：「法律係用喺保障市民，唔係打壓市民嘅工具！」那天從電視看見黑壓壓的遊行人潮，即使翌日考試，他也決定加入其中。

自此之後，「獅子」開始關心政治，○四年立法會選舉，他跟同學幫梁家傑派傳單，○六年加入公民黨，○八年做陳淑莊的助選團。「阿爸唯一唔放心，就係我入咗政治圈，佢成日叫我做AO（政務官），都係一樣從政啫，但公民黨同我理念一致，我唔會放棄，將來做律師，都係為咗幫人。」他認真道。

吳謦燃Profile

花名：獅子

年齡：22歲

學歷：中文大學社會科學（榮譽）學士

現職：陳淑莊立法會議員助理

公民黨青年公民執委

興趣：睇波、唱歌、夾Band、遠足

文：李嘉怡　攝：周景文