高爾夫球愛好者大都有「一桿入洞」（hole in one）嘅目標，行會成員張建東（Marvin，圖）啱啱喺英國St.Andrew高爾夫球公開賽打出一桿入洞佳績，今次仲係佢第五次打出一桿入洞，真係技術同運氣兼備，早前中策集團主席馬時亨一桿入洞後，筵開六席宴請好友慶祝，今次Marvin睇怕都走唔甩啦。
Marvin日前去香港會食晏，一排冇見清減咗好多，佢話早前同太太、朋友一齊去法國旅行兩星期，由於食得太多嘢，足足肥咗七磅，之後努力瘦身，跟住又去英國參加滙控董事會會議，順便參加St. Andrew高爾夫球公開賽當做運動，最好成績打出七十二桿，更意想不到再次打出一桿入洞佳績。
Marvin話佢第一次打出一桿入洞喺三十年前，當時只係學打咗高球兩、三年，純屬好運，第二、三、四次一桿入洞都係近幾年嘅事，全部發生喺粉嶺高爾夫球會，所以呢個場稱得上係佢嘅福地。Marvin咁好波，同佢每星期保持打三場波嘅習慣有關，可見一桿入洞都係勤力嘅回饋！