依家距離二○一二年立法會選舉雖然仲有兩年，但政圈已經展開好多工作，多個功能界別都傳出換人嘅消息，其中工程界嘅現任議員何鍾泰兩年後已經七十有三，年紀咁大，難怪早已傳出交波嘅聲音，但佢尋日話，下屆選唔選仲言之尚早。業界更有人話接任人好難搵，太年輕嘅未必壓得住場，有番咁上下資歷嘅，又對政治呢個熱廚房無乜興趣。如果何鍾泰全退、但繼任人又攞唔番佢嘅靚位，梗就弊啦，所以佢要睇定啲。
何鍾泰尋日話，覺得剛退休嘅前建築署工程師嚴建平都係理想嘅接任人選，事關嚴建平喺業界都有啲聲望喎！佢推介嘅嚴建平，今年五十五歲，做緊由何鍾泰擔任主席嘅工程界社促會高級副主席，似乎都係交棒嘅部署。
知情者話，嚴建平喺政府做咗三十幾年，唔見得獲業界一面倒支持，記得○八年一役，何鍾泰嘅主要對手係公文袋嘅黎廣德，當時黎攞到二千五百幾票，只係以一百九十三票之差輸畀何鍾泰，所以一二年選舉，如果何鍾泰嘅繼任人壓唔住場，可能失埋個席位，難怪何鍾泰一直唔肯明確表態，依家佢喺牌桌上玩得咁順，起身與否，真係要諗真啲至得！