中港台橋牌高手喺香港鬥一番，三十多名參賽者激戰三粒鐘後，由中國「棋聖」聶衛平及著名漫畫家蔡志忠率領嘅隊伍奪冠。打咗三十一年橋牌嘅蔡志忠賽後牙擦擦，話贏得唔辛苦，更大晒戰績：「我至今攞咗一百二十一個橋牌賽冠軍及亞軍，但我唔鍾意攞亞軍，多數攞冠軍。」尋日蔡氏獎牌榜上，又增添一面金牌，抵佢牙擦。
呢班名人前晚參加喺尖東富豪酒店舉行嘅「中國金融租賃名人橋牌邀請賽」，參賽者中，聶衛平嘅「牌齡」較短，只有十年，舊年佢冇參賽，今年一出場就捧盃。我哋問佢會唔會移居本港、大展拳腳，聶生擰擰頭話：「我冇興趣，你千祈唔好寫我想移民嚟香港呀。」
吉利汽車控股有限公司行政總裁桂生悅前晚都嚟打牌，原來佢玩咗橋牌十年，去年仲係呢個比賽香港公開組冠軍添，佢笑言打橋牌有助鍛煉腦筋，對做生意有幫助喎。