「五區公投」同政改方案兩場大戰撕裂咗泛民陣營，白鴿黨對公文袋嘅不和升級，最新發展係下一屆特首選舉都可能出現泛民硬碰硬嘅情況，事關白鴿黨諗緊唔會再喺二○一二年特首選舉中畀票公文袋嘅袋巾傑梁家傑，反而政改大戰後人氣急升嘅白鴿黨主席鐵頭仁何俊仁就可能出戰，政改一役後鐵頭仁支持者大增，好可能打破黨主席只可連任一屆嘅不成文規定，再冧莊主席做多兩年。
有白鴿黨核心成員透露，○七年佢哋支持咗袋巾傑參選特首，令對方以至整個公文袋人氣急升，事後唔少黨員都呻笨，認為長咗他人志氣，滅咗自己威風。何況家吓白鴿黨同公文袋嘅關係，同○七年袋巾傑參選特首時完全唔同晒，白鴿黨都無意再為他人作嫁衣裳。
不過，如果白鴿黨冇一個堂而皇之嘅理由就杯葛對方，肯定會畀人反咬佢哋小氣記仇兼破壞泛民團結，所以最兩全其美嘅做法，就係由該黨直接派人參選，人選方面，鐵頭仁同○五年參加過特首補選嘅李永達都係考慮之列。除咗特首選舉外，白鴿黨部署緊嘅地區選舉都會再度凸顯泛民大分裂，九龍東、新界東呢啲戰區勢必上演一幕幕搶位大戰。