田少尋日出席旅發局活動，畀人問起搞扶貧基金嘅事，本來話只講旅遊嘢，不過一聽到話有基金胎死腹中嘅傳聞，都忍唔住講番幾句。佢話不嬲都話個基金要年底先成立，不過佢都提到一啲新構思嘅，就係畀個別公司負責個別項目，因為有啲財團不嬲自己都有搞緊慈善項目。至於商會，田少話商會喺政策上畀意見、捐錢就得，至於籌劃點樣做慈善，田少就話︰「佢哋都唔係做呢啲嘢嘅。」

田少又話，點樣搵對象同埋用咩渠道去幫人就要詳細啲、小心啲處理嘞，費事好似幫到好多人，但其實每人分到嘅錢好少，啲錢就唔知用嚟做乜喎。估唔到有心做善事，搞起上嚟一啲都唔容易。