憑電影《歲月神偷》揚名海外嘅監製張婉婷同導演羅啟銳，繼今年二月喺德國柏林影展奪得「新世代」最佳影片水晶熊獎，香港大學都決定九月向佢哋頒授名譽大學院士銜，呢兩位港大校友獲母校嘉獎，真係可喜可賀。
張婉婷之前拍嘅《玻璃之城》曾經細緻描述港大生喺宿舍何東堂嘅生活點滴，盡顯校友情懷，除咗拍戲為母校做宣傳外，張婉婷都有喺母校嘅師友計劃中擔任導師，仲多次出席港大舉辦嘅講座同高桌晚宴。
至於同樣係「港大人」嘅羅啟銳亦不相伯仲，除咗搞電影，原來亦有參加港大師友計劃，而且將多部自己作品嘅收益捐畀大學。兩位同係港大友，而且仲咁幫得手，難怪母校要頒個名譽院士畀佢哋。除咗以上兩位外，仲有六位成功人士獲頒院士銜，包括前天文台台長林超英同埋香港潮屬社團總會創會主席陳偉南等。