呢個白鴿封殺令威力好大，撞啱運房局呢排多事，房屋問題一直老鼠拉龜，巴士工潮入面鄭汝樺又畀人鬧講錯嘢，立會大黨再對副局長玩封殺，鄭汝樺更加好似跛咗隻手咁，所以佢急急擺和頭酒，搵埋白鴿黨幾名負責人食飯，席間雖然冇直接議和，但都好言相勸白鴿黨下番啖氣。

咁邱武衰乜嘢呢？據講之前已經有啲合作問題，但最大導火線都係六月尾立法會審議政改時，菜園村居民搵高達協助同運房局傾復耕，高達唔想離開立法會，驚政改投票少佢神聖嘅一票，想喺立法會開會，但邱武又堅持要喺原本約定嘅修頓中心傾。結果菜園村幾十個村民硬闖立法會，要求見邱武不果。

黃成智約好飯局照取消

高達因為件事好興，白鴿黨上下討論之後，更達成三不政策嘅共識，據講，連黨員黃成智早就約好嘅飯局都要取消，可見白鴿黨幾興。

副局政助評核報告隨時出籠，邱武喺呢個時候又畀人落封殺令，想唔閉翳都難。睇番過去，行會成員兼新界王劉皇發、街工嘅梁耀忠都先後同邱武交過手，都被激到紮紮跳，家吓白鴿黨封殺佢，邱武要好自為之喇！