今次講嘅唔係普通生意，而係涉及納稅人荷包嘅公園管理。話說著名景點志蓮淨苑隔籬有個南蓮園池，啟用近四年，政府一直委託志蓮淨苑管理。公園唔止鬧中取靜，齋菜亦好出名，廣受市民同遊客歡迎。

託管期明年底屆滿，康文署諗住到時收番管理權，可能將公園重新招標，甚至自行接管喎。公園管得企企理理，好地地點解轉管理權？原來有遊園人士投訴，話園內管理太嚴，唔准食嘢飲嘢，連寫生都唔得，要求康文署收番管理權。

嗱，政府一插手，問題就嚟嘞。冇錯，不斷改善至有進步。重新招標，接手機構可唔可以令管理更上一層樓，依家落結論似乎早咗啲。如果當局自己管番，成功機會一定大打折扣，分分鐘又係一鑊泡，仲衰過舊時。

康文署接手掂唔掂，好多黃大仙區區議員都表示懷疑。南蓮園池唔係一般公園，除咗有仿唐木建築，仲有唔少珍貴古樹。有樹木專家話，係人都知康文署一向拾下拾下，管樹更加係一塌糊塗。再講當局接手之後，保育經費每年可能超過二千萬，搞唔好，唔止大筆公帑被揼落鹹水海，更加會令香港丟晒架。

叮！講開危樹病樹，早排大埔荔枝山村一棵細葉榕有幾百條毛蟲喺樹幹爬上爬落，恐怖夾核突。村民打政府熱線求助，結果捉蟲咁簡單嘅事，先後被康文署等五個衙門推來推去，兜兜轉轉頭尾拖足兩日都冇人認頭做嘢。南蓮園池如果交番畀康文署管，古樹隨時冇病變有病，有病死快啲。

最搞笑就係，康文署回應話，如果當局接管，技術同資金都成問題。至於管理知識，雖然「未完全掌握到，但唔代表我哋做唔到」。嘩，咁咪即係擺明攞公帑嚟較飛？

嗱嗱嗱，咪又出外判呢招呀！政府部門個個卸膊第一，郁吓就將工作外判，順手連自己嘅責任都外判埋。深水埗公園早排有老婦喺水深僅一呎嘅水池暈倒，外判管理公司保安員竟然拘泥程序，見死不救。本港近年多次發生水池浸死人悲劇，但康文署及房屋署轄下公園水池，好多周圍唔單止冇圍欄，保安員亦唔見人影。正因為當局對外判公司冇監冇管，至導致亂象環生。

計太一叮話齋，懶官管園池，公帑凍過水。如果南蓮園池交畀康文署管，唔止古樹牙煙，大吉利是萬一仿唐木建築失火，睇怕燒通頂、變「港版圓明園」都冇人理。叮！